故人

今個月係一個好錫我o既婆婆o既兩周年死忌

由我有記憶開始, 呢個婆婆一直都好錫我
佢對我好o既程度好過我婆同我"女麻"
佢老公都對我好好.... 而佢地有個外孫女同我年紀相約
我地細個時都成日一齊玩
我一直都叫佢地"蘇生"蘇太"
每次佢地外孫女叫佢地"公公""婆婆"時,
我都好有衝動跟口
我一直都好希望佢地真係我o既公公婆婆

真係好後悔搬左屋之後好少探佢地
後來公公先去一步, 呢件事我係一年之後先知道
知道o既時間我真係有莫名o既難過
婆婆o係公公過身之後身體每況愈下
記得有一次我去探婆婆
因為o個陣時我有做part-time
所以都想盡一下心意請婆婆飲茶
但婆婆身體實在太差... 佢連落街都有困難
同佢行到去商場時, 佢已經開始哮喘發作
我想送佢返屋企
但佢竟然好堅持要送我去巴士站....
o個陣時我真係好感動
上左巴士之後, 我回頭望佢
佢仲不停咁對住我揮手
佢o既表情好似o係度送走要遠行o既孫女
當時o既情形到今日我仲記得

仲記得我地最後一次o既對話
佢知道我同樓上o既男仔拍拖
佢就講左好多我男朋友屋企o既野比我知
又感概萬千話"呢個時代可以自由戀愛真係好"
我諗我永遠都唔會明白佢o既感受.....

有一日, 男朋友突然o係我office hour時打比我
同我講婆婆當日過左身
雖然知道婆婆一直身體都好差
但都係一時接受唔到佢離世o既事實
o個一刻我真係好難過好傷心
o個種心痛o既感覺, 即使係我親婆過身時都無.....
親人永遠離開自己大概就係呢種感覺罷....

唯一慶幸o既就係我可以有機會去送佢最後一程
呢樣係我最後, 亦都係唯一一樣可以為佢做o既事

至於佢o既媳婦.... 佢都係一個好好o既人
但佢竟然三十多歲就病逝.....
佢明明就係一個健康活潑o既人
亦都可憐佢兩個小朋友年紀輕輕就無左媽媽....
因為我唔知佢已經病逝, 仲o係小朋友&佢老公面前失言
雖然話不知者不罪
但每次諗起都覺得好內疚

早幾個月前曾經發過一個夢
我夢見自己仲係住o係舊屋
就好似乜野都未發生過一樣
大家仲健健康康咁生活
我見到大家好似以前咁o係門口談笑風生
我夢到婆婆同隔離屋o既另一個婆婆傾緊計
我好驚訝咁話"蘇太.... 你唔係已經去左o架咩?"
(我都唔知點解夢中o既我會咁直接)
佢就對我笑笑而無出聲
佢媳婦就做左個手勢叫我唔好咁張揚
我o個一下諗"佢地係人係鬼都唔緊要,
最緊要就係佢地可以開開心心咁生存,
同埋我可以見到佢地"
當然, 當夢醒時都係要接受現實
當我將呢個夢同男朋友講時
佢話"你真係好鍾意呢家人"
佢講得真係完全無錯

細個o既時候, 覺得他人對自己好係理所當然o既事
唔知乜野原因, 細個o既時候我總係好容易得到大人o既疼愛
直到出左黎做野, 遇到各式各樣XXo既同事 (對佢地o既comment太低俗, 要消音)
我就漸漸明白他人對自己好並唔係必然
當遇上人事上o既唔開心時
就好自然會諗起細個時對自己好o既人
同時間亦明白自己而家要擔當o既角色係"施"而唔再係單方面o既"受"

我會永遠懷念公公婆婆一家人....